A cidade de Vigo acolleu o mércores pola noite a gala dos Iberian Festival Awards, na que o Resurrection Fest, que era finalista en catro categorías, obtivo o premio ao mellor cartel polo da súa edición de 2018, que tivo como cabezas a Kiss, Scorpions e Ghost.
Desde a organización do festival vivariense agradecen este galardón logrado nos Iberian Festival Awards, que son "o único recoñecemento que premia aos mellores festivais da Península Ibérica, así como aos seus promotores e pezas crave da industria nos festivais de música de España e Portugal", din.
O festival estivo nomeado en seis categorías e logrou ser finalista en catro, que ademais da gañadora de mellor cartel eran as de mellor festival de gran formato , mellor achega turística á rexión e mellor comunicación. Tamén estivo nomeado nas categorías de mellor directo internacional para Prophets of Rage e mellor activación de marca para Galipizza.
O Son do Camiño, un dos protagonistas da gala
O Son Do Camiño erixiuse como un dos protagonistas da gala ao resultar gañador nas categorías de Mellor Novo Festival e Mellor Actuación internacional do ano pasado na Península, a do rockeiro Lenny Kravitz.
Este recoñecemento prodúcese tan só dous días antes de que as entradas do festival compostelán salgan á venda, que estarán dispoñibles a partir deste venres ás 12 do mediodía.
