Mergulladores da Garda Civil, co apoio de compañeiros en terra, así como de axentes da Policía Nacional, realizaron este venres unha segunda inmersión na zona do peirao deportivo e arredores de onde apareceu o pasado 27 de decembro o coche do veciño de Viveiro Alejandro Meitín San Isidro, ao que se perdeu a pista o pasado día 15.
O achado doce días logo do seu turismo no fondo do mar levou a encarrilar a investigación cara a que o mozo —que desapareceu tras acudir a unha cea de empresa nun local da cidade— puidese sufrir un accidente caendo co seu vehículo na zona do porto deportivo. Aínda que se rastrexou a zona o día en que un mariñeiro alertou da presenza do coche no fondo do mar, sen resultados positivos, este venres procedeuse a unha nova inmersión, que trataba de determinar que o corpo non puidese quedar enganchado no fondo, onde había bastante lodo, ou nalgún dos pantaláns próximos, que evitasen que o cadáver saíse á superficie.
No rastrexo, que se prolongou durante preto de dúas horas e no que as autoridades intentaron a discreción, os axentes non atoparon nada para desesperación da familia do Álex, que ve como pasan os días sen saber nada do seu ser querido, que desapareceu sen deixar rastro.
Alejandro, de 34 anos de idade, foi visto por última vez na mañá do día 15 de decembro, logo de abandonar o local onde ceou cos seus compañeiros de traballo. Na súa contorna máis próxima sempre barallaron que a desaparición non se debía a causas voluntarias, polo que peitearon todos os camiños posibles ata o seu domicilio en Vieiro para descartar que puidese sufrir un accidente.
Iso é o que parece cobrar máis forza, tras aparecer o seu coche no mar, co portelo do piloto aberto, o que podería levar a pensar que tratou de saír do vehículo, un Ford Fiesta gris. Un coche que non se sabe con certeza que día caeu, o que sería clave para saber o que puido facer Álex desde que se lle botou en falta.
