A organización do Resurrection Fest deu a coñecer o cartel definitivo para a edición de 2022, que durará por primeira vez cinco días, do mércores 29 de xuño ao domingo 3 de xullo, e que incorpora como últimas novidades a Mastodon, The Raven Age, Ciclonautas e Bourbon Kings.
Deftones, Judas Priest, Sabaton, Avenged Sevenfold e Korn son os artistas principais en cada unha das xornadas, entre un centenar de grupos que forman un dos carteis "máis completos e equilibrados".
Ademais, este venres ás doce do mediodía ponse á venda na páxina web do evento as entradas soltas para cada día do festival a un prezo de 79 euros máis gastos de distribución e desde a organización avisan de que "estarán moi limitadas". As da festa de presentación -o mércores 29- pódense adquirir a 39 euros máis gastos.
O festival informará proximamente sobre as zonas de descanso de pago, Beachcamp e Glamping, e sobre as viaxes organizadas en autobús desde distintas cidades para acudir a Viveiro.
<>
