O Concello, a Deputación e os promotores do Resurrection Fest realizaron o mércores un balance conxunto da última edición, "a máis internacional" en palabras do seu director, Iván Méndez, con entradas vendidas en 43 países e 320 medios de comunicación tanto nacionais como foráneos acreditados, "unha marca histórica". O subdirector, David Méndez, indicou que están á espera de coñecer os resultados do estudo económico encargado á USC, un impacto que o deputado provincial de relacións institucionais, Álvaro Santos, cifrou en 13 millóns. "O festival xera un volume de negocio similar ao Mundial de Rusia, porque o impacto non territorio é inmediato. Por cada euro investido pola Deputación –achega 130.000– conseguimos un efecto multiplicador de cen euros", asegurou.
A alcaldesa, María Loureiro, fixo fincapé na seguridade do evento, proba diso son "as numerosas nais e pais que acoden cos fillos", e dixo que no punto lila informouse sobre agresións e abusos sexuais pero "non houbo ningunha denuncia deste tipo". Revelou que o máximo responsable policial quedou "sorprendido" pola orde e ausencia de altercados á saída dos grandes concertos e destacou o excelente funcionamento do posto de mando avanzado que desprazou o 112. Á rexedora tamén lle chamou a atención o "civismo" dos asistentes, que mantiveron "practicamente limpo" Viveiro e ademais de reiterar o agradecemento aos veciños de Celeiro pola súa comprensión estendeuno a todos os traballadores municipais, desde Policía Local a Protección Civil ou as brigadas de obras e xardíns, polo seu esforzo durante os días do festival.
O evento, dixo Loureiro, supón "unha publicidade impagable" para o municipio e por iso tanto ela como Álvaro Santos insistiron no apoio do Concello e a Deputación desde os seus inicios.
Para o director esta foi a edición co cartel "máis completo e potente" da historia dun festival que segundo recordou ten elementos diferenciadores como a iniciativa Resukids, que esgotou prazas, "o que confirma que o Resu é un festival para toda a familia", ou a fidelidade dun público "exemplar", "un dos mellores públicos do mundo, un completo exemplo de civismo e comportamento todos os días", dixo. Iván Méndez tamén insistiu no agradecemento da organización aos veciños de Celeiro pois "o festival altera o seu día a día".
Os promotores comentaron que levan catro meses traballando na próxima edición do evento, que se celebrará en datas similares ás deste ano, ao redor da primeira quincena de xullo.
"Esperamos para o próximo ano ter máis Resu e mellor", dixo David Méndez, quen recordou que o traballo da última edición non termina coa finalización dos concertos, senón que quedan semanas por diante para desmontar o recinto e devolver o campo de Lavandeiras ao seu estado orixinal.
