A familia que atopou o pasado martes unha botella de cristal unha mensaxe no seu interior na praia vicedense de San Román, conseguiu completar o círculo dunha historia que comezou hai case un década, o 14 de decembro do 2009, nunha goleta que asucaba o océano Atlántico fronte á costa este estadounidense. A bordo da mesma, de nome Virginia, viaxaba Keith Barkwood, a persoa que lanzou o frasco que finalmente atopou no areal mariñán o grupo de seis nenos madrileños que veranean cada ano no Vicedo.
Laura Sánchez, unha das nais dos curmáns que protagonizan a parte europea da historia, explica que na noite do mércores recibiron un correo electrónico de resposta de Barkwood, logo de que atopasen outra posible dirección do americano. "Ao parecer, o mail que viña nos folios hai tempo que non o consulta, pero buscamos en internet e escribímoslle a outro correo que vimos nun perfil que entendemos que podía ser seu. A partir de aí todo foi moi rápido, porque nos contestou ao pouco tempo, intercambiamos algún correo máis e a verdade é que estamos todos moi emocionados", relata Laura, cuxa familia emprendeu onte regreso a Madrid tras pasar as súas vacacións en San Román.
Nalgunha das misivas, o americano explícalles algunhas cuestións relacionadas coa súa vida e tamén que lanzou máis dunha botella á auga. "Tiña 32 anos cando lancei a botella a bordo do Virginia. Tirei varias na travesía e só outras dúas foron localizadas. Unha foise directa a unha praia de Carolina do Sur —na costa de Estados Unidos— e foi atopada só un mes despois. A outra pasou algúns anos máis lavándose no océano e apareceu noutra praia das Bahamas", apunta Keith Barkwood.
Lanzou varios frascos máis ao océano, pero só apareceron outros dous, en areais de Carolina do Sur e as Bahamas
O antigo mariñeiro agradeceu que lle escribiron e mostrouse encantado co destino da súa botella, tanto nos correos como no seu propio Facebook, no que compartiu fotos dos nenos, do vidro e da tripulación que o acompañou no Virgina: "Imaxinaba que sucedería así, cunha familia de nenos que a atopan e gozan dunha experiencia emocionante abríndoa".
A familia tamén lle agradeceu que dese comezo a esta historia en 2009: "Nesta época de novas tecnoloxías e vida estresante, é importante pararse, escribir unha mensaxe e tirar a botella... ¡Para eles foi moi inspirador e tamén para os adultos!".
Así mesmo, contoulles a súa vida actual e algunhas pasaxes do seu pasado. "Como vos poderedes imaxinar (vendo a súa ficha), agora son oficial de policía na cidade de Palmer, en Alaska. Deixei de navegar hai uns anos, tras o nacemento da miña filla Birdie. Agora xa non me gusta estar lonxe de casa", di. Anteriormente, Keith Barkwood estivera navegando durante dez anos, "principalmente en remolcadores en Alaska", pero xusto realizou "un pequeno descanso en 2008 e 2009 para navegar en veleiros", sinala.
Foi o momento no que lanzou a botella ao mar, nunha travesía entre a illa de Saint Thomas, no Caribe, e Virginia, na costa norteamericana. Previamente, Barkwood estivera enrolado desde moi novo nos Marines do exército americano e incluso formou parte durante catro anos da unidade encargada de transportar ao presidente estadounidense en helicóptero, coincidindo con Bill Clinton.
