A residencia de anciáns de Trabada é xa unha realidade. Este xoves abriu as súas portas e entraron os primeiros usuarios. Ten dez, aínda que neste primeiro día entraron sete. Os outros tres chegarán esta mesma fin de semana. Ademais dáse a circunstancia de que todos eles son veciños do municipio.
A alcaldesa de Trabada, a socialista Mayra García, estivo acompañada do presidente da Deputación, Darío Campos, e estiveron cos residentes e os traballadores neste primeiro día.
Mayra García mostrábase moi contenta "porque vemos o froito de moitísimo traballo que nos levou isto. Un proceso moi longo pero que paga a pena ao ver as familias aquí xuntas. Os maiores, os netos, os fillos, vendo a tele, lendo... Están moi contentos e para nós é unha satisfación enorme".
De feito, a rexedora non dubidaba en apuntar que en realidade se trataba dun "día histórico para Trabada, porque conseguimos dar un servizo que é fundamental para nós dadas as características que temos no noso concello e que fan moi necesaria unha residencia para os nosos maiores".
Ao mesmo tempo, Mayra García non esquivaba outras cuestións como a económica, da que tamén se mostraba satisfeita xa que recordaba que "o prezo medio que pagarán os usuarios será de 650 euros. Penso que se trata dunha cantidade moi axeitada para Trabada, onde as pensións son bastante baixas e hai que pensar nos prezos que se manexan en centros coma o noso, onde é fácil que cheguen aos 1.200 euros".
A media de idade dos primeiros usuarios da residencia é duns oitenta anos e dos dez que a estrean, sete son mulleres e tres homes.
Deuse a circunstancia de que este xoves foi unha xornada festiva en Trabada, xa que se celebraba o San Marcos, e a alcaldesa subliñou a casualidade "porque realmente había moito que celebrar por parte de todos os veciños".
