O regreso do Feve por A Mariña recuperou todas as frecuencias anteriores ao confinamento respecto ao transporte de pasaxeiros, pero con soamente dous vagóns debido ao baixo número de pasaxeiros que o utilizan. Para moitos asiduos deste medio de transporte, o tren non volveu, senón que os seus horarios e o seu percorrido foron ocupados polo "trenecito".
A volta do servizo Oviedo-Ferrol trae consigo unha nova forma para adquirir billetes. A tradicional venda en portelo foi substituída por unha máquina, operativa na maioría das estacións, coas que comprar o billete desexado. Tamén se estableceu a venda a través da web de Renfe, por teléfono ou na app Renfe Tickets. A pesar destas novas incoporaciones, a adquisición de billetes ao revisor si se mantén.
O tren soamente ten dous vagóns debido ao baixo número de pasaxeiros que o utilizan
A volta do tren vén acompañada do protocolo anticovid establecido pola Xunta de Galicia e colocado en todas as estacións e apeadeiros para informar os viaxeiros. A isto súmanse diferentes carteis con códigos QR para ver os horarios, así como o enlace para acceder ao formulario de rexistro de viaxeiros procedentes de fóra de Galicia. En estacións como a de Burela reforzouse a sinalización sobre as precaucións para atravesar as vías, ou vetando o acceso a certas áreas fóra das plataformas.
O tren foi dos medios máis utilizados no século pasado na Mariña á hora de trasladarse dun municipio a outro en transporte público. Con todo, a partir dos anos 80, o servizo empezou a decaer ata o seu declive actual.
En canto ao transporte de mercancías, seguen á espera tras eliminarse os convois con aluminio e madeira de eucalipto.
