O regreso dun clásico focense

O establecemento Happy Days de Foz retoma a actividade na rúa Álvaro Cunqueiro de Foz con nova xerencia. Ao cargo de Anablys Puentes, quen reside na localidade desde hai 13 anos, e con axuda da súa filla colleu as rendas do local situado nunha das zonas con máis movemento da vila focense.

Anablys non é allea ao sector, pois sempre traballou no mesmo como camareira. Agora decidiu dar un paso máis dando o salto á xerencia. Todo empezou case sen pretendelo. "Fixen unha pregunta a ver canto custaba o aluguer do local e funme enrolando ata poñerme á fronte, non foi algo premeditado, fíxeno sen pensalo moito e decidín arriscarme", confesa.

A céntrica localización do establecemento, situado nunha das zonas máis concorridas, dado que nas súas inmediacións están varias entidades bancarias, Correos, o Concello e supermercados, foi determinante á hora de que a hostaleira decidise dar o paso. "É unha zona de moito movemento todo o ano, unha rúa transitada, que me gustou por iso e arrisqueime por ese motivo. Se fose noutra localización posiblemente non o faría", sinala.

Anablys explica que a súa intención é servir montaditos, ofrecer petiscos, hamburguesas, bocadillos e diferentes racións de comida. "Segundo como funcione se cadra poderiamos cambiar o enfoque e ofrecer máis alternativas, iremos vendo", comenta a responsable do local que funciona de novo desde esta semana en horario de seis e media da mañá a once da noite. O seu propósito é amplialo a última hora no caso de que se autorice. Ademais prevé pechar un día á semana para descanso do persoal, en principio baralla facelo os domingos, unha xornada que considera "máis tranquila, sobre todo durante o inverno" e recorda que os antigos donos xa pechaban en domingo.

A rúa Álvaro Cunqueiro gaña animación coa reincorporación do local que leva Anablys Puentes

BOA RESPOSTA. As primeiras xornadas de actividade resultaron tan ben que xa pensa en contratar persoal, dado que "non damos feito, polo que posiblemente teremos que coller empregados. A ver se as cousas seguen así, ata agora estou contenta de como está a funcionar". Tampouco descarta introducir algunha novidade nas racións e petiscos para que a clientela se anime a pasar polo establecemento, no que por agora non prevé dar comidas.

O Happy Days conta con todas medidas de seguridade que esixe a normativa sanitaria vixente para a prevención da propagación do covid-19 e que supoñen un gasto adicional, pero ao ser un local grande dispón dunha capacidade maior. Ademais a súa nova xerente quixo renovar a decoración. O comedor que tiña na parte superior está agora dividido e conta con mobiliario tipo chill out para darlle un toque diferente. A amplitude do local, que ademais dispón dunha terraza con oito mesas, anima a Anablys nesta nova aventura.

A responsable do establecemento espera así mesmo unha boa resposta por parte dos veraneantes, dado que ao ser moitos habituais xa os coñece. "Penso que imos ter movemento. Ao mediodía hai moita xente, só paramos 15 minutos parar para comer", comenta a hostaleira.