viernes. 04.12.2020 |
El tiempo
viernes. 04.12.2020
El tiempo

Seis detidos nunha rechamante operación en Ribadeo que se saldou co comiso de 500 quilos de coca

Un helicóptero da Garda Civil. ARQUIVO
Un helicóptero da Garda Civil. ARQUIVO
O Equipo de Investigación contra o Crime Organizado da Garda Civil asestou así un duro golpe a organizacións de narcotráfico que operan nas Rías Baixas

Unha operación do Equipo de Investigación contra o Crime Organizado (ECO) de Galicia, con sede en Pontevedra, que depende da Unidade Central Operativa (UCO) da Garda Civil con base en Madrid, saldouse este mércores coa detención de polo menos seis persoas e o comiso de 500 quilos de cocaína nunha vivenda de Ribadeo, utilizada como inmoble de almacenaxe para a posterior distribución da mercadoría.

Os axentes desprazáronse desde Pontevedra seguindo o rastro desta organización da comarca do Salnés. O dispositivo chamou a atención entre a veciñanza da localidade de Piñeira, nunha vivenda da cal se practicaron as detencións e a incautación da droga.

Gerardo Rial Iglesias é un dos detidos. Trátase dun narcotraficante reincidente, posto que xa foi detido en 2007 na operación Destello, unha das máis relevantes das que se desenvolveron nas Rías Baixas. De feito, foi condenado por esa causa.

Entre a detidos figura así mesmo un importante capo das Rías Baixas, zona á que pertencen a maioría dos detidos na tarde deste mércores en Ribadeo. Os pontevedreses teríanse desprazado ao municipio ribadense para recoller os 500 quilos de cocaína que prevía entregarlles outra organización.

A mercadoría intervida nesta operación ten un importante valor no mercado ilícito, onde con facilidade podería alcanzar os 15 millóns de euros.

Coa operación desenvolvida en Ribadeo aséstase un duro golpe a organizacións de narcotráfico que operan nas Rías Baixas.

Seis detidos nunha rechamante operación en Ribadeo que se saldou co...