O acusado de prenderlle lume a un inmoble da Rúa Concello de Sarria de Foz, no que había varias persoas dentro, recoñeceu os feitos na Audiencia Provincial de Lugo, pero negou que se tratase dunha vinganza. "Ese día bebera moito e provoquei o lume, pero non foi para vingarme do meu caseiro. De feito avisei ao dono do piso", dixo.
Os axentes da Garda Civil que acudiron ao lugar dos feitos confirmaron que o acusado se atopaba visiblemente ebrio, aínda que outras testemuñas declararon que "estaba ben". O home xa indemnizou ao afectado e a fiscal, que pedía doce anos de cárcere, rebaixou a súa petición a dous anos de prisión.
Segundo alegou a Fiscalía, o acusado tiña alugado un piso en Foz, no mesmo edificio no que vivía o caseiro coa súa familia. O propietario do inmoble envioulle unha carta en marzo de 2017, reclamándolle as débedas que tiña e advertíndolle de que sería desafiuzado por falta de pagamento. Posteriormente, o 29 de abril, "movido polo ánimo de vinganza cara ao seu caseiro e consciente de que había máis persoas no edificio", o acusado prendeu lume á roupa de cama da súa habitación. As chamas propagáronse rapidamente ao resto dos aveños do dormitorio e a toda a vivenda, pero o home chamou ao caseiro para dicir que había fume e foise a tomar unha cervexa á terraza do bar de en fronte, "mentres os veciños ían baixando das súas casas ao cheirar o fume e chamaban ao 112".
O fiscal recolle no seu escrito que o acusado foi diagnosticado dun trastorno adaptativo en relación co consumo abusivo de alcol, pero explica que esta circunstancia non lle impedía distinguir os actos correctos dos incorrectos e que puxo en perigo a vida doutras persoas de forma consciente.
O ministerio público solicitou inicialmente unha condena de doce anos de prisión, así como o pago de indemnización ao parque de bombeiros de Barreiros polos gastos de extinción, taxados en 994 euros, e outra ao dono do inmoble polos danos ocasionados, que ascenderon a 9.901 euros. Tal e como quedou probado no xuízo, o acusado xa indemnizou ao propietario do edificio, polo que a fiscal recoñeceulle as atenuantes de embriaguez e reparación do dano e rebaixou a súa petición en dez anos.
