A comunidade de montes de Boimente organiza este domingo no curro de Candaoso a Rapa das Bestas, que alcanza a súa edición número 50 e por iso todos os participantes nas carreiras recibirán unha medalla conmemorativa.
Os comuneiros esperan poder reunir aos 300 cabalos que teñen nos montes Buio e Lerín para este espectáculo, nunha edición para a que nomearon monteiro maior ao edil do PP e deputado no Congreso Jaime de Olano. "Sempre procurou botarnos unha man en todo e estanos axudando a intentar recuperar a declaración de festa de interese turístico nacional", indica o directivo Carlos Martínez.
As actividades programadas empezan o sábado ás oito da tarde cunha degustación gratuíta de xamón e chourizo e verbena co grupo Lume e Mercedes Ben Salah. Xa o domingo a xornada arrincará coa feira de gando e a degustación das típicas sopas de allo. Para as dez está prevista a baixada dos cabalos desde o monte e o seu peche no curro para as tarefas de rapa e marcado. Non faltarán tampouco as pelexas de garañóns.
Pola tarde a partir das cinco e media serán as carreiras e competicións nas que se repartirán un total de 1.830 euros en premios. Haberá proba de andadura nas categorías de serrada, chapeada e trotóns con premios de 150, 100 e 50 euros máis trofeo en cada unha; carreira de cabalos en dúas modalidades con idéntica remuneración, e carreira de burros con premios de 150, 100, 50 e 30 euros máis trofeo. Para terminar a xornada haberá verbena co dúo Eclipse, que tamén animará a sesión vermú.
A comunidade de montes anima a participar e precisa que hai aparcadoiros amplos e accesos en bo estado. Martínez recorda que organizan a festa sen ningunha axuda económica e que en 50 anos "nunca se deixou de facer a rapa".
