Os condutores atopáronse con cortes intermitentes —o máis duradeiro prolongouse durante sete horas, desde as once menos cuarto da noite e ata as seis da mañá deste martes— no tramo da Autovía do Cantábrico (A-8) que salva Mondoñedo. Nun cómputo total, a infraestrutura estivo sen uso polo menos doce horas. O trazado non quedou despexado ata case as tres da tarde e pola noite volveron a aparecer as brumas ata o punto de volver pechalo. Mentres, tanto, o Ministerio de Fomento recibiu xa as ideas innovadoras para combater as néboas causantes destes peches.
O Estado non informa aínda sobre cantas foron as iniciativas presentadas, nin sobre cales ou de que tipo son, pero si precisou, en declaracións a este xornal, que o prazo para presentar ofertas pechouse o 27 de abril: "Nun principio debíase pechar o día 18, pero no Boletín Oficial do Estado do 24 de marzo modificouse a data de presentación" que debía formalizarse de forma presencial en Madrid.
Desde o gabinete de comunicación de Fomento engaden que "poderían quedar ofertas por recibir vía correo e durante a ponte do Primeiro de Maio" por iso o período foise postergando ata a semana actual.
Os encargados da convocatoria abrirán o 11 de maio a oferta técnica e decidirán máis adiante cal será a máis vantaxosa economicamente. Licitaranse dous tipos de ideas: unhas relacionadas con sistemas de axuda á condución entre a néboa, ás que Fomento destina 1,8 millóns de euros. O outro grupo de iniciativas enmárcanse nos prototipos que aislen, eliminen ou despracen a bruma.
Para este segmento achega o Estado 5,4 millóns. Unha vez adxudicado o contrato para unha ou varias das ideas, os adxudicatarios han de cumprir un prazo de execución e de entrega de oito meses, co que poderían probarse os prototipos no tramo, por estas datas, pero en 2019.
Mentres, Fomento defende as medidas transitorias adoptadas pola Dirección Xeral de Tráfico e a súa homónima de Estradas, porque, segundo afirma, "están a garantir en todo momento que os usuarios circulen polo itinerario da A-8 e da N-634 entre A Xesta e Mondoñedo en adecuadas condicións de seguridade".
USUARIOS. Os condutores pon en dúbida que sexa máis seguro. Por exemplo, a coordinadora comarcal do Bloque Nacionalista Galego (BNG), Ana Ermida, que por traballo circula a diario polo trazado, publicou fotos na súa conta de Twitter do tramo con néboa e utiliza a ironía para referirse ás medidas instaladas: "Era mellor que experimentasen con gasosa". Tamén un veciño de Ribadeo, Emilio Piñeiroá, circulou pola mañá polo trazado cando reabriu "pero era moi perigoso, íamos a 60 por hora e non se vían nin as balizas". Desde a DXT obxectan que estes equipos lumínicos están a permitir manter máis tempo operativo ou en uso o tramo.
