A secretaria provincial do PSOE de Lugo, Patricia Otero, instou ao presidente da Xunta, Alberto Núñez Feijóo, a exercer as súas competencias en industria e garantir con axudas a viabilidade da planta de Alcoa en San Cibrao.
"Acabáronse as escusas para a Xunta e o PP", manifestou a socialista, que criticou que durante o último ano Feijóo, o conselleiro de Industria, Francisco Conde, e os dirixentes do PP de Lugo "afrontasen os problemas de competitividade da planta con absoluta pasividade" e "escusándose en que o prezo da enerxía era competencia do Goberno" do Estado.
Patricia Otero asegurou que "todas as iniciativas anunciadas pola Xunta e o PP sostíñanse en esixencias ao Goberno central". "Nin unha soa medida do PP comprometía recursos ou actuacións do Goberno de Feijóo, que é quen ten as competencias en materia de industria, tal e como recolle o artigo 30 do Estatuto de Autonomía de Galicia".
Fronte a iso, a socialista considerou necesario que Feijóo exerza as súas competencias con axudas, no caso de que sexan necesarias, para garantir a viabilidade de Alcoa.
O PSOE de Lugo considerou que a Xunta debe porse "as pilas", traballar e mobilizar os recursos necesarios
Ademais, recordou que ao longo de 2019 e no primeiro trimestre de 2020 "a evolución do prezo da enerxía descendeu de forma relevante" como resultado da estratexia enerxética posta en marcha polo Goberno de España, así como polos distintos cambios no mercado enerxético.
"Feijóo e o seu Goberno non poden seguir de brazos cruzados, botando balóns fose, sen exercer as súas competencias", manifestou a socialista, que asegurou que "xa non é tempo de escusas" ou de limitarse a esixir ao Executivo estatal.
Fronte a iso, o PSOE de Lugo considerou que a Xunta debe porse "as pilas", traballar e mobilizar os recursos necesarios con axudas para contribuír ao mantemento do emprego.
Tras destacar que o Goberno de Sánchez traballou para conseguir os seus obxectivos en relación ao prezo da enerxía, advertiu que os recortes anunciados a semana pasada que afectan especificamente á planta de San Cibrao refírense a problemas de competitividade industrial que non gardan relación co prezo da enerxía.
"Son problemas de índole industrial que incumben de forma moi directa ás competencias de Núñez Feijóo e do seu Goberno", asegurou Otero, que instou á Xunta implicarse na viabilidade de Alcoa sen esquecerse dos empregos nas auxiliares.
