PSOE e BNG do Valadouro retomarán os contactos para tratar de sacar adiante un novo pacto de goberno. Unhas reunións que poderían empezar a semana próxima, tras a finalización das festas patronais, unha vez que a asemblea local nacionalista deu o visto e prace a volver iniciar as conversacións, tras a ruptura do pacto entre ambas as formacións pouco logo da investidura do socialista Edmundo Maseda como alcalde.
"O mandato da asemblea foi de retomar as conversas e farémolo desde o principio, partindo de cero, e con todas as posibilidades abertas", contaba o portavoz nacionalista, Eduardo Chao, que encabezará os próximos encontros con dirixentes socialistas, en principio sen asesores.
Tanto Chao como Maseda confirmaron conversacións telefónicas previas buscando unha nova reunión, que non se puido producir con anterioridade ao non reunirse a asemblea de afiliados valadourense ata o pasado fin de semana.
Será a mesma asemblea a que teña que ratificar o acordo no caso de que o haxa, algo que parece factible tamén por parte dos socialistas. "Estamos dacordo co que eles din de empezar de cero", sinala o rexedor valadourense, que se fixa nas similitudes dos programas electorais de ambos os partidos, aínda que tamén recoñece que hai puntos nos que habería que traballar.
Un acordo garantiría a aprobación do orzamento municipal, vital para a posta en marcha de diversos proxectos que axudarían a mellorar á vida dos veciños, reitera o alcalde, quen antepón o benestar dos cidadáns aos intereses de partido.
Tamén desde o Bloque apostan por un goberno progresista para seguir mellorando o futuro do municipio, pero non esquecen que foron os seus anteriores socios de goberno os que romperon o pacto anterior. "Foron eles vos que racharon ou pacto de gobernabilidade que asinamos tras a investidura do alcalde", sinala Chao, un dos edís con que conta o BNG neste mandato, para o que tamén foi elixido Eliseo Teijeiro. O PSOE ten catro edís.
