Tanto o alcalde socialista en funcións de Burela, Alfredo Llano, como o portavoz do BNG, Mario Pillado, xa avanzaron o domingo tras coñecerse o resultado electoral da mesa 01-005 U, situada no IES O Perdouro, a súa disposición a sentar a falar do futuro goberno local logo de quedar ratificados os seis concelleiros para o PSOE e tres para o BNG.
Polo momento, ningún dos dous partidos se pronuncia sobre os termos nos que levará a cabo a negociación, simplemente coinciden en asegurar que retomarán as negociacións no punto que as deixaron tras as eleccións de maio, cando xa mantiveran contactos a pesar de que naquel momento os socialistas eran máis partidarios de gobernar en solitario con acordos puntuais.
"Agora mesmo temos que pensar en poñer en marcha o Concello porque hai moitas cousas pendentes coma vos orzamentos, a actualización das taxas, contratacións ou a RPT que teñen que avanzar», asegurou este luns Llano e subliñou que "a filosofía que primará á hora de chegar a calquera acordo será a de beneficiar ao conxunto da veciñanza por encima da fórmula de goberno que se elixa: gobernar nós en solitario, en coalición ou con acordos puntuais". Llano tamén destacou o apoio veciñal ao PSOE, que gañou en todas as mesas.
Pola súa banda Pillado volveu mostrar a súa satisfacción por conservar o seu concelleiro: "O voto ao BNG representa a vontade dous burelaos e burelás de pór fin a catro anos de maioría absoluta do PSOE e por teren un goberno municipal máis plural". De cara ás negociacións, o nacionalista avanzou que deben analizar como serán "máis útiles á veciñanza" e adiantou que actuarán "coa máxima responsabilidade". Tamén avanzou que condicionará o seu apoio ao PSOE "en base a aspectos programáticos e áreas de goberno".
