O Goberno central traballa na instalación de catro proxectos para incrementar a visibilidade no tramo de Mondoñedo a A Xesta da A-8, dúas deles centrados no illamento da propia néboa, mentres que os outros se basean na axuda á condución cun sistema de luces led e láser para evitar as saídas de vía e os alcances. Estes dous últimos prototipos presentáronse onte nun acto que contou coa presenza do delegado do Goberno en Galicia, Javier Losada, quen se mostrou moi satisfeito de anunciar que "hoxe estamos máis preto de contar cunha autovía aberta ao tráfico ao cen por cento e con peches mínimos".
Javier Losada recordou que no que vai de ano a néboa xa obrigou a pechar o tramo do alto do Fiouco –o de maior altitude dunha autovía en España, con preto de 700 metros– un total de 500 horas, "o que supón 21 días", aos que hai que sumar os 29 do pasado ano, en que se decretaron 700 horas de peche da A-8. "Nos próximos anos con estes proxectos reduciranse as horas por baixo de 100, a só catro días", recalcou o representante do Executivo central en Galicia, nun acto no que estivo acompañado da subdelegada do Goberno na provincia, Isabel Rodríguez.
Losada recalcou que desde a apertura da estrada en 2014 foron numerosos os problemas causados pola néboa, que se tratan agora de erradicar coa posta en marcha destes prototipos, que se prevé póidanse instalar despois do verán, xa que é necesario ver a súa evolución durante a primavera, ao ser a época con máis incidencia de néboas. "A partir de entón, tomarase a decisión sobre a súa implantación, dun ou dos dous sistemas combinados, xa que son compatibles", aclarou o delegado do Goberno, quen confirmou tamén que a época estival é tamén a elixida para validar os outros dous prototipos, co "fin de conseguir seguridade e apertura do tráfico ao cen por cento".
DOUS O TRES ANOS. "O que queremos é aplicar, si ou si, e canto antes, estes prototipos", recalcou Losada quen, no entanto, non cre que se poidan pór en marcha nun prazo anterior a dous "ou tres anos", porque actualmente estase en fase de construción e experimentación a escala real e na contorna propia onde se instalarán, na chamada tecnicamente "zona pésima", entre Mondoñedo e Abadín, que é onde se concentra a néboa característica deste tramo, que está moi relacionada coa súa proximidade ao mar e a incidencia dos ventos.
O investimento para o desenvolvemento destas solucións supera os 5,6 millóns de euros, ao que hai que sumar os 4,5 que xa se investiron en anos anteriores con balizas led nos laterais da calzada e a opción do desvío automático pola N-634 cando a visibilidade baixa de 40 metros. Unha cifra que se espera tamén reducir ata 30 coa instalación o próximo verán de novas balizas intelixentes, ás que a Dirección Xeral de Tráfico destinará un millón de euros.
VISIÓN. As dúas opcións presentadas o martes para buscar mellorar a visibilidade. Unha delas, a que leva a cabo a Ute Sener-API, baséase nun sistema de sinalización horizontal intelixente sobre a propia calzada, usando tecnoloxía led, de forma que aparecerán sinais luminosos no chan que indican se hai ou non obstáculos, onde están os coches e a velocidade recomendada no tramo segundo as condicións. Así, os condutores verán frechas verdes se a calzada está expedita e cruces vermellas e sinais de redución de velocidade se o vehículo que lles precede está demasiado cerca. "Eu compároo co conto de Garbancito, que vai marcando o camiño", aseverou un responsable das firmas encargadas deste proxecto.
Previr os impactos pola falta de visibilidade é o obxectivo desta solución, do mesmo xeito que a outra presentada este martes, neste caso a cargo da empresa Tecnivial e que xa conta coa instalación posta en parte do tramo e que tamén axudará a evitar saídas de vía, posto que consiste na instalación de balizas nas marxes da calzada.
Son instalacións separadas 24 metros unha da outra que emiten un láser, cuxa liña vai marcando o trazado da calzada a ambos os dous lados, "o que permite ao condutor vela en ambos os sentidos», recalca un dos técnicos da firma, con sede en Guadalaxara. Usarán, en principio, luz de cor verde, "porque é a lonxitude de onda que mellor detecta o ollo humano", aclara, aínda que tampouco descartan o vermello ata saber cal é o que mellor funciona entre os condutores.
A aplicación funciona con enerxía solar e podería facelo 17 días ininterrompidamente sen necesidade de carga. Entre os sistemas de seguridade con que conta para evitar que o láser quede apuntando á estrada e poida cegar atópanse detectores de ultrasonidos e de impacto. "Se se pon algo diante ou hai un accidente a luz apágase", recalca o técnico, quen aclara ademais que se se detecta un vehículo a velocidade excesivamente baixa, parpadea para avisar ao condutor que circula detrás.
Circulan ao día 8.500 vehículos
7 PROXECTOS Foron os seleccionados, dos que un comité de expertos escolleu á súa vez catro. Dous deles inciden directamente na néboa para illala. Son o da Construtora San José, de difusión por aspersores de materiais higroscópicos, e o de Typsa, que combina barreiras estáticas e dinámicas que empregan dispositivos fluído-mecánicos.
