Voluntarios de Protección Civil de Barreiros retiraron este mércores pasado un golfiño que apareceu varado e morto na canle próxima ao espigón da ría focense, en Anguieira. Os integrantes do colectivo descenderon polas rocas e cunha corda suxeitaron o animal como puideron para arrastralo sobre as pedras do dique cara á zona dunar, onde xa puideron cargalo no vehículo pick-up.
O responsable da agrupación, Javier Díaz ‘Trosky', sinala que o día anterior viron o cetáceo nadar detrás dun veleiro que entraba na ría, pero "esta mañá, arredor da unha, chamáronnos dicindo que estaba varado xunto da escolleira". O golfiño común ten 1,90 metros de lonxitude, segundo a medición efectuada para comunicar a Coordinadora para o Estudo dos Mamíferos Mariños (Cemma), que tiña previsto enviar persoal especializado para recoller mostras do animal. O corpo do mamífero quedou depositado nunha nave municipal namentres.
SEN MATERIAL. A agrupación barreirense de Protección Civil alertou este mércores de que non conta con medios para realizar ningún tipo de rescate acuático. "A fin de semana pasada o mar arrastraba unha persoa na praia de Arealonga e tiveron que sacala uns surfeiros que estaban na auga, porque nós non dispoñemos de embarcación zódiac dende que o ano pasado avariou a que tiñamos e xa non se puido reparar polos dános que tiña", lamenta Díaz.
O responsable do colectivo indica que "lamentablemente mírase aos concellos pola cor política, así é como a Xunta achega os medios". Engade que nin sequera teñen roupa para entregar aos novos voluntarios e que se valen de axudas de entidades e particulares. "Só temos a vontade, a gana e o corazón que poida achegar o persoal, que está ao pé do canón para o que faga falla", subliña.