A praia ribadense de As Catedrais continúa demostrando o seu tirón e completará o xoves un total de seis días consecutivos nos que completaría o seu aforamento de 4.812 visitantes diarios, cifra máxima permitida pola Xunta de Galicia. Nun ano no que había dúbidas sobre se o areal conseguiría manter o tirón debido a todos o problema derivados da crise do coronavirus, a praia ribadense continúa mostrándose como un valor firme. Todos os pases habilitados para o luns, o martes e o mércores estaban esgotados e, ao peche desta edición, quedaban só uns poucos para a xornada do xoves. Cara ao final da semana os horarios de mareas farán que, para poder visitar a praia, sexa necesario ir ao redor das dez da mañá ou incluso antes.
Para o resto do mes tamén hai xa numerosas reservas feitas na páxina web da Xunta habilitada para tal fin, ás que hai que engadir as que se xestionan desde a propia vila ribadense en establecementos de hostalería ou na oficina de información e turismo, entre outros puntos.
As cifras do mes de agosto son tradicionalmente moi destacadas e o ano pasado foron 24 os días en que As Catedrais colgou o cartel de 'completa'. Para este ano non se espera que se chegue tan lonxe debido ao descenso de visitantes xeneralizado, pero polo momento o comportamento do areal está a ser moi notable sobre todo tendo en conta as expectativas.
Ademais dáse a circunstancia de que ata o momento non se produciu ningún tipo de incidente na praia e os socorristas por agora non tiveron que intervir máis que para algunhas accións de tipo menor.
Este ano tamén se reforzaron por parte do Concello algúns servizos exteriores como os baños, que aínda que custan 1 euro se desinfectan cada vez que se usan para garantir a hixiene.
Neste mes de agosto están a funcionar tamén de forma bastante satisfactoria diversos servizos turísticos que ofrece o Concello de Ribadeo por exemplo o tren que percorre a localidade dando un paseo turístico ás persoas interesadas e que está a rexistrar unhas cifras aceptables de participantes logo de todos os problemas do mes de xullo a consecuencia das restricións impostas pola pandemia.
COSTEIRA DO BONITO. O Ministerio de Pesca comezou a vixilancia e inspeccións da costeira do bonito no Cantábrico co patrulleiro P-63 Arnomendi. Vixiará e prestará apoio aos boniteros ata o día 28.
