Os candidatos do PP ao Congreso por Lugo Jaime de Olano e Joaquín García Díez consideran un "agravio" a obrigación de fichar no sector pesqueiro e comprometéronse este xoves ante directivos de Porto de Celeiro e a Confraría de Pescadores a impulsar iniciativa "para evitar a obriga de fichar nas embarcacións pesqueiras". A inclusión da pesca na Lei de Rexistro da Xornada Laboral, aprobada polo Goberno de Pedro Sánchez é vista polos populares como "un despropósito" que é "imposible de cumprir porque os barcos como centros de traballo non son equiparables a unhas oficinas ou fábricas en terra, nin polos seus horarios nin en moitas ocasións polos sistemas de retribucións".
A argumentación dos deputados do PP baséase en que "o modo de vida e de traballo é totalmente diferente ao de terra, hai barcos que están a faenar durante mareas máis dun mes con horarios diferentes cada día". E abundan en que "se na pesca de altura danse as circunstancias apuntadas de longos períodos de tempo en alta mar, na pesca artesanal o sistema é inviable porque na maioría dos casos os traballadores cobran por captura e non por horas traballadas, de maneira que cando non hai as capturas suficientes non hai unha retribución completa".
Din De Olano e García Díez que observan perplexidade nos armadores de Celeiro posto que "desde o Ministeiro de Traballo non tiveron en conta a necesidade de contemplar medidas distintas para o Réxime Especial do Mar nin lles consultaron, tal como sería preceptivo, amparándose no Convenio 180 da Organización Internacional do Traballo".
Para os populares, esta iniciativa socialista supón "un descoñecemento e falta de sensibilidade e de diálogo co sector pesqueiro que se suma ao golpe propiciado hai uns meses ao aplicar unha forte subida aos recibos da Seguridade Social á maioría dos traballadores do mar, especialmente na baixura".
Outra preocupación que pulsaron en Celeiro os populares son as consecuencias dunha saída do Reino Unido da Unión Europea sen acordo, cuestión que abordarán co sector nun próximo encontro no que contarán coa conselleira de Mar, Rosa Quintana.
