O PP de Burela fixo pública este sábado a proposta que gardaba baixo a manga para presentar ao BNG co fin de desaloxar aos socialistas da alcaldía. Fano despois de que os nacionalistas rexeitasen publicamente gobernar con eles e desvelando que estarían dispostos "por primeira vez na historia" a apoiar a investidura dun alcalde nacionalista "sen ningún tipo de contrapartida a cambio".
"Non se poden tomar decisións sen escoitar á outra parte", recoñeceu o presidente da xestora do PP, Manuel Rouco, "nós nunca falamos de facer un goberno de coalición, non era a nosa idea ter ningunha concellaría pero dende o BNG non quixeron escoitar a nosa proposta e agora deberán explicarlles aos seus votantes por que non hai un alcalde nacionalista en Burela".
Os populares lanzaban esta proposta, din, conscientes de que no BNG non apoiarían un candidato do PP á alcaldía, "pero baixo uns acordos de mínimos, relativos a unha serie de obras e servizos fundamentais para o futuro inmediato de Burela, estariamos dispostos a apoiar uns presupostos razoables, transparentes e equilibrados para o próximo exercicio", aseguran logo de tomar a decisión de non volver establecer contactos cos nacionalistas. E é que, a xestora adoptou esta postura despois do pronunciamiento público do portavoz nacionalista, Mario Pillado, coa súa negativa a negociar co PP.
MANUEL ROUCO Baixo uns acordos de mínimos, estariamos dispostos a apoiar uns presupostos
Para os populares a idea principal da súa proposta era desaloxar aos socialistas da alcaldía. "Consideramos que ningún dos concelleiros socialistas da anterior corporación de goberno está validado para ser investido alcalde da nosa vila e, sería dificilmente explicable para os veciños e veciñas de Burela, que aqueles partidos que durante estes últimos catro anos estiveron cuestionando a inacción do goberno municipal, agora premien a mesma cunha alcaldía para un dos seus membros, ben cos votos a favor ou ben cunha abstención, no vindeiro pleno de investidura", aseguran os populares.
Así mesmo, subliñan que "por riba das siglas políticas está o pobo de Burela e, a situación tan crítica na que consideramos que se atopa require valor e dar un paso á fronte, tomando decisións que noutras circunstancias serían impensables".
"Non queremos un alcalde socialista, pero eles poderían negociar despois con eles se así o consideraban oportuno dende unha posición de forza", indican. Así as cousas os populares non confían en ningún achegamento dos nacionalistas, aínda que subliñan que se isto sucedese estarían abertos a iso.
