Portos de Galicia, organismo dependente da Consellería do Mar, recibiu o pasado venres o escrito do Concello de Ribadeo onde expuña o problema que sofre desde a pasada semana coa praga de moscas que arrasa a veciños e hostaleiros próximos ao porto de Mirasol, onde miles de toneladas de madeira son o punto de orixe desta praga. Desde o ente público estase "traballando con total colaboración coas empresas que teñen a madeira amoreada no porto para clarificar a situación, xa que non está determinado aínda cal é o foco do problema", aseveran desde o organismo público.
Dentro deste marco de colaboración coas empresas, "de xeito preventivo e co obxectivo de clarificar a situación, Portos de Galicia envioulles un requerimento para que realicen as comprobacións oportunas e que, no caso de que esa mercadoría sexa a orixe do problema, tomen as medidas correctoras necesarias coa maior urxencia posible", aseguran.
Unha praga de pequenas moscas invadiu un bo número de vivendas e establecementos de hostalería situados na zona do porto comercial de Mirasol. Miles de toneladas de madeira agrupada en dezanove montículos son o punto de orixe deste foco invasivo que ameaza con rachar a campaña estival de veciños, hostaleiros e comerciantes de Ribadeo. O Concello contratou a unha firma especializada en tratamento de pragas que confirmou a inxente cantidade de troncos como a xénese do problema.
"Esta praga chega no peor momento do ano, no verán, e a escasos días da celebración do Ribadeo Indiano. Hai pequenas moscas que se coan por calquera físgoa", asegurou un hostaleiro da zona afectada que ve como teñen que "estar constantemente limpando. é un trastorno enorme", recoñece.
O hostaleiro tivo que reforzar as quendas de limpeza nas súas instalacións para plantarlle cara a esta situación e "onde antes limpaba unha persoa, agora teñen que facelo dúas. As habitacións hai que ventilarlas e ese é un dos momentos que as moscas usan para coarse nas habitacións" asevera o empresario.
"Por fortuna nós non ofrecemos servizo de restauración, pero algúns amigos tiveron que pechar as terrazas dos seus locais".
ás portas do Ribadeo Indiano espera que "o Concello e Portos de Galicia tomen as medidas adecuadas para que esta situación acábese definitivamente", comenta o hostaleiro ribadense.
