Portos iniciou este martes no peirao vello de Viveiro os traballos previos ao comezo da obra de derriba dos galpóns, previsto para a próxima semana. Operarios sinalizaron a zona para que os usuarios do aparcadoiro retiren os vehículos e poder executar os traballos.
"A partir do luns a zona quedará valada e comezarán as obras co baleirado dos galpóns, nos que aínda quedan algúns andeis e outros elementos fixos", segundo informa o delegado da Xunta, José Manuel Balseiro. Nunha segunda fase procederase á retirada do fibrocemento das cubertas das catro naves que quedan en pé e despois xa se poderá introducir a maquinaria necesaria para a derriba das estruturas.
A obra, cun prazo de execución de dous meses, inclúe acondicionar a chaira e habilitar novas prazas de aparcadoiro. Serán cen máis, polo que unha vez terminado o peirao vello terá capacidade para 335 vehículos.
A actuación, cun orzamento de 124.600 euros, inclúe zonas de axardinamento, iluminación e conexión de servizos urbanos neste espazo, de 2.500 metros cadrados.
