O servizo de Portos de Galicia prevé acabar as obras de dragado da dársena e da boca de acceso ao porto de Foz no prazo dun mes e, posteriormente, proceder á instalación de novos pantaláns na mesma zona pesqueira.
Así o anunciou a Consellería do Mar, este domingo, a través dun comunicado, no que explicou que as intervencións no peirao do municipio lucense forman parte dun proxecto que conta cun investimento de medio millón de euros.
Segundo as previsións da Xunta, a primeira fase do proxecto acabará no prazo aproximado dun mes, se non se produce ningún imprevisto. Despois, executarase a segunda fase, que poderá finalizarse o próximo novembro.
Con estas medidas, a Administración autonómica asegurou que se dá resposta á demanda do sector portuario de actuar en profundidade para devolver calado á dársena pesqueira e náutica recreativa.
Tamén na Mariña lucense, a consellería está a traballar na instalación de novas defensas e medios de amarre para o porto de Viveiro-Celeiro, unhas obras que prevé terminar en outubro.
