Portos de Galicia informou este martes de que contratará á empresa Tragsa "en vindeiras semanas" a obra de derriba dos catro galpóns que quedan no peirao vello de Viveiro e a posterior adecuación da chaira, un proxecto orzado en 120.000 euros.
Desde o ente público non achegan datas concretas para a realización dos traballos, que terán un prazo de execución de dous meses desde o seu inicio, aínda que a previsión manifestada anteriormente pola Xunta apuntaba a que puidesen empezar este ano.
Para poder realizar estas derribas Portos de Galicia tivo que levar a cabo diversos trámites administrativos encamiñados ao rescate das tres concesións que seguían vixentes –o cuarto galpón que queda en pé xa fora rescatado na fase anterior pero non se puido tirar por seguridade ao servir de apoio a outro– e xusto hai un ano chegou a acordo con dous dos propietarios.
O terceiro, que tiña actividade na súa nave, alegou ao non estar de acordo coa valoración económica do ente público pero finalmente tamén asinou a principios deste ano.
A liberación do peirao vello é unha vella demanda do Concello, que leva anos insistindo a Portos "para conseguir que Viveiro poida abrirse ao mar" e non só por cuestións estéticas ou funcionais, senón tamén por "seguridade" polo estado das edificacións, segundo manifestou a alcaldesa, María Loureiro, en numerosas ocasións.
