A candidata do BNG á presidencia da Xunta, Ana Pontón, comprometeuse este xoves a aprobar un plan no que se concrete a participación do Executivo galego na nacionalización de Alcoa e a "recuperación" da área sanitaria da Mariña "no primeiro Consello da Xunta" que se celebre tras as eleccións se se converte na próxima presidenta autonómica.
No marco dun mitin virtual no que se abordou a situación da comarca, a nacionalista asegurou que se accede ao Goberno galego nese primeiro Consello porase en marcha un Plan A Mariña, que "significará concretar cal é a porcentaxe coa que a Xunta vai participar na nacionalización de Alcoa" e un proxecto de "rescate" para o sector hostaleiro e turístico.
Así mesmo, a candidata do Bloque detallou que "a outra cara do plan é a sanitaria", xa que, segundo dixo, os cidadáns da comarca denuncian desde "hai anos" os "recortes de servizos e a degradación que se produce na sanidade pública". Por iso, asegurou que "é momento" de apostar pola mesma e comprometeu que un goberno da Xunta no que o BNG ostente responsabilidades "recuperará" a área sanitaria da Mariña, o que se traducirá en máis "medios e máis recursos".
"Faremos historia na Mariña", vaticinou a líder nacionalista, quen afirmou que os galegos "pararán os pés" ao PPdeG. Así, insistiu en que resulta preciso "un golpe na mesa" que mostre que a comarca "existe". "Feijóo está a deixar caer á Mariña e o próximo 12 de xullo temos que poñer á fronte ao BNG para levantala", resolveu.
Ademais, remarcou que "esta comarca, ao longo da súa historia, sempre tivo que loitar e traballar para conseguir avances". Por esta razón, recalcou que o domingo os seus cidadáns "deben responder as urnas" para non permitir que "os que están a mentir e intentando tapar a situación da Mariña por intereses electorais se saian coa súa", en alusión ao presidente da Xunta e candidato do PPdeG á reelección.
"Feijóo está a deixar caer A Mariña e o próximo 12 de xullo temos que poñer á fronte o BNG para levantala", dixo Pontón
Nesa liña, Pontón volveu criticar que o presidente autonómico limitase "a dous ou tres bares que había que pechar" un rebrote que dous días despois levou ao peche de toda a comarca. "Isto pasa porque só mira os seus cálculos electorais, cando debía salvagardar a saúde das persoas", razoou á vez que chamou a deixar "atrás un goberno que non está á altura" da situación.
No mitin virtual, a alcaldesa de Barreiros, Ana Ermida, puxo en valor a "difícil decisión" adoptada hai unha semana polo Bloque ao suspender os actos electorais programados na Mariña e subliñou que a cidadanía precisa da "valentía" dos dirixentes para adoptar este tipo de resolucións. Ao mesmo tempo, acusou ao Goberno galego de maquillar " datos" sobre os contaxios localizados na comarca e censurou que Feijóo "se atreva a poñer á mesma altura as decisións de se ir votar ou a tomar un café".
Mentres, a cabeza de lista do BNG pola provincia de Lugo, Olalla Rodil, instou a converter a xornada electoral nun "acto de dignidade colectiva" e un "clamor masivo", e remarcou o "dereito" dos cidadáns da Mariña a contar cunha área sanitaria propia e os recursos que iso levaría para o hospital comarcal, así como a unha mellora nas súas vías férreas e estradas.
Ana Pontón tamén participou este xoves nunha homenaxe ao "feminismo" das "heroínas da pandemia", esas "mulleres, na súa maioría precarias", que estiveron "ao pé do canón" nun momento tan difícil e ás que prometeu "devolver un pouco de dignidade". Nesta homenaxe "pequena e modesta, pero que sae do corazón" celebrada na compostelá Praza de San Clemente participaron caixeiras, limpadoras, agricultoras, traballadoras da sanidade, residencias e centros de día, persoal de correos e a propia matrona de Ana Pontón.
"Vós representades o mellor que ten este país e é para min tremendamente emocionante poder compartir convosco este momento, logo de demostrar que, cando viñan duras, necesitabamos as mulleres para soster a sociedade con xenerosidade, entrega e valentía para que puidese seguir en pé", asegurou.
A partir de aí, comprometeu unha lei de igualdade "adaptada á realidade do século XXI que fomente realmente a corresponsabilidade" ou unha lei de igualdade salarial "que prohiba contratar con administracións públicas a aquelas empresas que paguen menos a mulleres que a homes". Ademais, expuxo a creación dunha Valedora da Igualdade, o recoñecemento das familias monomarentais cun novo marco legal "que garanta a súa protección" e medidas para facilitar a conciliación familiar e laboral como a extensión da gratuidade a todas as escolas infantís de cero a tres anos.
