Convocan aos veciños da Pontenova para a realización dun cribado no Hula

O Concello A Pontenova convocou aos seus veciños para realizar un cribado poboacional que permita detectar positivos por coronavirus que sexan asintomáticos. As probas realizaranse o próximo domingo no Hospital Lucus Augusti (Hula) de Lugo.

Trátase dun procedemento distinto ao realizado noutros concellos como Vilalba, Xove ou Viveiro, onde se desprazou o persoal do Sergas para a realización das probas en espazos habilitados no propio municipio.

Nun comunicado, o Concello da Pontenova indica que os interesados en realizar a proba deben chamar ao Consistorio –982 34 22 77– antes do venres ás 12.00 e facilitar os seus datos persoais. Desde o Hula poranse en contacto cos veciños para indicarlles a hora na que se deben presentar no hospital para a realización da proba.

Desde o Concello apuntan que, aínda que o cribado está "aberto a toda a poboación", está dirixido especialmente aos veciños que traballen en establecementos de atención ao público como supermercados, farmacias, oficinas, tendas ou gasolineiras.