Un novo caso de violencia no ámbito doméstico ou familiar produciuse na madrugada deste pasado sábado ao domingo na parroquia vivariense de Celeiro. Axentes da Policía Nacional tiveron que deter a un home despois de que este agredise á súa nai dentro do domicilio da muller, quen afortunadamente non sufriu lesións, polo que non foi necesario que recibise asistencia médica.
O detido pasou a noite nos calabozos da comisaría de Viveiro ata que durante a mañá foi posto a disposición do xulgado de garda, que determinou unha serie de medidas de protección para a persoa máis vulnerable, que neste caso é a proxenitora, que consisten no afastamento a 50 metros de distancia.
A orde afecta tanto ao fillo detido, como á noiva deste, debido á conduta de agresividade manifestada por ambos nalgún momento cara á muller, o que lle provoca temor e intimidación. Ao parecer, sente indefensa, razón pola que alertou ás autoridades. O aviso permitiu atallar unha actitude reiterada de falta de respecto e agresión, que causa medo e ansiedade á persoa afectada.