A Policía Local de Viveiro reforzará os seus servizos durante a celebración do rally que se disputará este fin de semana na zona e intensificará a vixilancia e control "na vía que fai de enlace entre os tramos cronometrados, establecendo controis de velocidade e de alcol", segundo indica a alcaldesa, María Loureiro, tras a celebración esta semana da xunta de seguridade á que asistiron por parte do Concello o edil de deportes, o xefe da Policía Local e o responsable de Protección Civil.
A carreira será o sábado pero xa o venres poderase visitar o parque técnico dos automóbiles que estará no peirao vello. Ademais no aparcadoiro da praia de Covas fronte aos Castelos faranse as verificacións dos vehículos participantes.
PROHIBIDO APARCAR. O Concello pide aos condutores que colaboren coa organización do evento e non estacionen nin no peirao vello nin na explanada de Covas desde este xoves ás tres da tarde.