A corporación de Viveiro abordará no pleno extraordinario do próximo martes, ás oito e media da tarde, a aprobación inicial da ordenanza sobre a regulación do tráfico no casco antigo da cidade. O obxectivo deste regulamento é restrinxir o tráfico no centro, onde se celebra un mercado semanal cada xoves e concéntranse os monumentos máis emblemáticos, así como a maioría de establecementos comerciais e dos servizos.
O goberno entende que con esta ordenanza "mellorarase a calidade de vida das persoas que viven en dita área urbana e das que a utilizan con frecuencia, pois na zona hai un tráfico de coexistencia e nela resulta privilexiado o tráfico peonil", segundo figura na web do Concello. A ordenanza reducirá a dúas as rúas de entrada e saída, limitará o tempo de carga e descarga a media hora, pero tamén prohibirá aparcar.
Na orde do día da sesión tamén figura a renuncia da tenente de alcalde e nova subdelegada do Goberno, Isabel Rodríguez, a quen podería substituír, se se segue a orde da candidatura que presentou o PSOE aos anteriores comicios, Jacobo Bermúdez, traballador de Alcoa e delegado de CC.OO. na factoría.
DERRUBO. A Consellería de Mar, a través de Portos de Galicia, anunciou que xa se iniciaron os trámites administrativos para contratar as obras de derriba dos catro galpóns que quedan aínda en pé no peirao vello de Viveiro.
O delegado territorial da Xunta, José Manuel Balseiro, sinalou que "con esta acción comeza a fase final dun proxecto que incluíu a reversión da titularidade destas naves á Xunta para derrubalas dado ou seu mal estado e acondicionar a zona para uso común". Tamén destacou que se dá resposta a unha demanda histórica, á vez que avanzou que "o obxectivo é empezar as obras este ano", afirmou.
Desde Portos non concretan unha data de inicio "porque depende se se fai como encomenda de xestión ou a través dun concurso público, unha decisión que se tomará nas próximas semanas", aclararon. Os traballos están orzados en 120.000 euros e o prazo de execución, unha vez que comecen as obras, será de dous meses.
Pola súa banda, a alcaldesa de Viveiro, a socialista María Loureiro, valorou o anuncio como positivo, pero mostrouse cauta. "Alegrámonos porque levamos moitos anos demandándoo e non queriamos pasar outro inverno cos galpóns aí. Hai dous anos dixéronnos o mesmo e por iso somos un pouco escépticos. Sabemos que xa se lles pagou o rescate aos adxudicatarios, así que esperamos que agora vaia adiante porque é un tema importante, non só a nivel de estética, senón de seguridade", sinalou.
Namentres, o portavoz do PP no municipio vivariense, Antonio Bouza, agarda que "antes de que acabe o ano xa poida estar executado, dado que xa hai consignación presupostaria" e indicou que "a ver se despois das eleccións se lle dá unha solución que non sexa simplemente deixar prazas de aparcamento". Recordou que "a nosa formación xa propuxera nas anteriores eleccións a construción dun aparcamento subterráneo e unha área de entretemento en superficie para os veciños", concluíu.
