A Plataforma Sanitaria da Mariña denunciou este luns esperas para consultas en centros de saúde da comarca de ata "quince días", unhas demoras que considera "inasumibles". A presidenta do colectivo, Montse Porteiro, constatou que nesa zona a "Atención Primaria está sobrepasadísima, porque, ademais de que non se cobren vacacións, nin días de libre disposición, nin baixas, van xa dous anos que non poñen nin médicos, nin enfermeiras para as persoas desprazadas ou para os turistas".
Así, subliñou que nestes momentos na Mariña "triplícase a poboación", de modo que nos meses estivais pódense pasar "os 200.000 habitantes nos 14 concellos" da comarca. "Algúns son pobos de 3.000 habitantes e agora igual nos atopamos con 12.000 ou 15.000 persoas", exemplificou Porteiro.
"Nestas poboacións litorais multiplícase a poboación por tres e, a maiores da sobrecarga que xa soportan por estar un mínimo de persoal, os centros teñen que atender tamén todos os desprazados. Hai veces de demoras de ata quince días para unha cita na Mariña", lamentou.
Porteiro puxo o exemplo de Barreiros para denunciar o "desmantelamento" que observa na Atención Primaria na Mariña. "En Barreiros hai tres médicos, un dos cales leva de baixa moito tempo e non está a ser cuberta. Vai haber algún día que non estará nin a que está de baixa, nin a substituta, nin algún dos outros dous médicos. Ante isto o que fan é programar consultas para a tarde con médicos doutros lugares e que xa estiveron a traballar pola mañá", avisou.
A Plataforma Sanitaria da Mariña súmase á UXT na advertencia de que se pode estar "a devaluar" o servizo sanitario ante a presenza de desprazados e turistas en toda esta comarca da provincia de Lugo.
