A Audiencia Provincial de Lugo acollerá entre o martes e o xoves o xuízo contra dous homes para os que a Fiscalía solicita tres anos de prisión por delitos de estafa e falsidade en documento mercantil, ao supostamente duplicar e falsificado cartóns bancarios de entidades con sede en Estados Unidos.
Segundo consta no escrito do Ministerio Público, os dous procesados son cidadáns nacidos en Nixeria que, de común acordo con outras persoas que están en paradoiro descoñecido, copiaron bandas magnéticas de cartóns de crédito e débito verdadeiras coa finalidade de transferir a súa información a outras que estaban baleiras e así poder empregalas de modo fraudulento.
Deste xeito, os presuntos responsables empregaron este material para realizar distintas compras entre xullo de 2010 e febreiro de 2011 en establecementos dos municipios lucenses de Foz, Ribadeo, Xove e Viveiro. En total, de acordo con cifras da Fiscalía, gastáronse máis de 27.500 euros.
Os titulares destes negocios, ao advertir as compras, reclamaron estas cantidades ás entidades emisoras dos cartóns orixinais, que resultaron ter as súas sedes en distinta localidades de Estados Unidos.
A todas estas entidades comunicóuselles a existencia do procedemento xudicial contra os dous presuntos autores dos feitos para que puidesen exercitar cantas accións civís e penais considerasen, pero non se executaron pola "insuficiencia de recursos" do Departamento de Xustiza de Estados Unidos -segundo consta no escrito da Fiscalía-.
Por mor destes feitos, o Ministerio Público pide para os dous acusados tres anos de prisión como coautores de delitos continuados de estafa e falsidade en documento mercantil e unha pena de multa por 12 meses a razón de 12 euros diarios. De igual modo, deberán indemnizar conxuntamente aos bancos americanos defraudados "nas cantidades que foron defraudadas", tal e como se determine na sentenza.
