Un delito de malos tratos non habituais en Viveiro pode custarlle a un home un ano de prisión e máis de 1.000 euros de indemnización. Fiscalía tamén propón para el a prohibición de aproximarse a unha distancia inferior a 150 metros da súa parella durante dous anos e de comunicarse con ela durante o mesmo tempo, así como dous anos de privación de armas.
Ademais reclama que o acusado indemnice con 600 euros á parella polas lesións causadas e ao Sergas na cantidade de 482,64 pola atención prestada. O fiscal solicita así mesmo que se manteñan as medidas acordadas no auto do 13 de xullo de 2019 ata que haxa sentenza firme que as impoña. Estableceuse protección con prohibición de achegarse a menos de 100 metros da vítima.
Os feitos producíronse o día anterior ao citado cando discutiu coa súa parella sentimental no domicilio familiar do municipio de Viveiro e nun momento dado golpeou a esta coa fregona e lle propinou puñadas na cabeza. Así, causoulle un hematoma na cara anterior flexura do cóbado esquerdo, outro en forma de banda na cara anterior da boneca esquerda, unha contusión na cadeira dereita e outra na rexión temporo-parietal esquerda. Requiriu 15 días de curación non impeditivos e non quedaron secuelas.
O xuízo será o día 20 no Xulgado do Penal número 1 de Lugo.
