O xuízo a un adestrador deportivo da Mariña pola súa relación cunha xogadora menor de idade, que foi aprazado a principios de xullo por mor das restricións á mobilidade impostas para frear o brote de Covid-19, celebrarase a próxima semana na Audiencia Provincial de Lugo, entre os días 24 e 25 de setembro.
A Fiscalía pide cinco anos de cárcere e outros cinco anos de liberdade vixiada para ese adestrador, acusado de manter unha relación sentimental cunha das súas xogadoras, que era nese momento menor de 16 anos. De acordo co escrito de acusación, os feitos sucederon en datas "non determinadas", pero en todo caso entre xullo de 2015 e xaneiro de 2017, cando o acusado foi denunciado.
O ministerio público sostén que mantivo "unha relación sentimental" coa menor co "ánimo de satisfacer os seus instintos libidinosos", para o que se valeu da "súa posición de referente e autoridade" como "adestrador deportivo". Segundo o relato do fiscal, "ao longo do tempo de relación, o acusado mantivo coa menor en varias ocasións contactos de natureza sexual con bicos, e caricias íntimas mutuas".
Ademais da pena de cárcere, a Fiscalía pide que se lle prohiba ao acusado aproximarse á vítima "a unha distancia inferior a 500 metros" ou "comunicarse con ela por calquera medio durante 6 anos".
Tamén solicita que se lle prohiba exercer "calquera profesión ou oficio" que "leve contacto regular e directo con menores de idade durante cinco anos", así como que indemnice á vítima con 6.000 euros.
O caso procede do xulgado de instrución número 1 de Mondoñedo.
