O festín do piñeiro barato das Landas francesas está en vías de esgotar o seu stock para os serradoiros casteláns e os fabricantes de taboleiros, e con iso o afundimento de prezos no resto de masas forestais do norte peninsular. O piñeiro, sobre todo o insigne, podería dobrar en breve a súa pobre cotización actual e tanto a industria galega que o aproveita, como as asociacións forestais, asinaron un compromiso para revitalizar a súa explotación nuns momentos en que moitos silvicultores xa se esqueceron del, optando polo eucalipto. Pero as pragas ameazan o seu futuro.
A catastrófica desfeita que provocou o temporal de 2009 no país veciño, arrasando máis de 300.000 hectáreas de piñeirais, así como o hundimiendo posterior da construción e gran parte dos serradoiros, deixaron sen aproveitamento as masas. Son fáciles de ver parcelas de piñeiro antigo sen explotar en Asturias e algunha aquí pero o mercado volve moverse e este mércores mesmo en Santiago, 51 entidades do sector da madeira asinaron un acordo para promover o seu uso, fixar prezos mínimos de referencia e impulsar a mellora xenética para maior calidade e resistencia ás enfermidades.
Asociacións de propietarios, viveiros, serradoiros, empresas de servizos forestais e industria de transformación acudiron á firma dun acordo que permita estar preparados para "o aumento da demanda futura" cun monte multifuncional onde o piñeiro volva ter sitio. O resineo tamén parece atractivo.
O novo conselleiro de Medio Rural, José González, que participou na comisión parlamentaria que alumou o novo Plan Forestal, parece decidido a apoiar os piñeirais con árbores do país e o insigne para que volvan ter protagonismo no monte galego e fálase de comarcas e montes demostrativos ou unha marca propia para os de calidade. Agora pénsase en destinos como o mobiliario, unha vez perdido o de embalaxes de pesca ou o uso para postes.
AMEAZAS. Pero o piñeiro en Galicia ten serios inimigos e non só o cancro resinoso ou a clásica procesionaria das súas copas. Tras anos de abandono de moitas masas seguen aí pero a enfermidade que alarma é o nemátodo Bursaphelenchus xylophilus, un verme de menos dun milímetro que ataca a madeira e seca a árbore. Orixinario de Estados Unidos e estendido por gran parte de Asia, é o mal máis temido e, tras detectarse en 1999 no norte de Portugal, en 2008 tamén entrou no sur de Galicia, provocando áreas de corentena que afectaron a serradoiros. Como a transmisión é por escaravellos, Monochamus galloprovincialis, e expándese ao transportar coníferas infestadas, o problema é maiúsculo para o piñeiro do país, Piñeiro pináster.
A esta ameaza únese outra peste,esta vez por fungos, que avanza desde o oriente peninsular e que se coñece como banda marrón, que seca os bosques.
