O Día Mundial dos Océanos tampouco pasou desapercibido na comarca, onde os pescadores dos portos de Burela e Celeiro están involucrados coa súa limpeza. Frear o lixo mariño é o obxectivo da Fundación Ecoalf, que a través do proxecto Upcycling the Oceans pretende recuperar os residuos recollidos polos tripulantes dos barcos para darlles unha segunda vida mediante a reciclaxe e a economía circular, iniciativa á que tamén se uniu Ecoembes. Unha parte transfórmanse en polímero, fío e tecidos de primeira calidade para fabricar produtos de moda.
O proxecto arrincou en Galicia en 2018 con apoio da Autoridade Portuaria, a Lonxa da Coruña e Pescagalicia, e os portos de Burela, Celeiro e Corme, co respaldo das súas organizacións de produtores, confrarías e de Portos de Galicia. A colaboración de 280 pescadores galegos que traballan en 28 barcos de arrastre logrou retirar 4.662 quilos de lixo dos fondos mariños en 2019.
O proxecto sumou 151.975 quilos de residuos mariños en España en 2019, coa participación altruísta de 2.600 pescadores que faenan en 550 barcos pesqueiros de arrastre de 40 portos
O xerente da asociación Arpega do Barco, Juan Carlos Corrás, cre necesario que «todos sexamos responsables, pois coidar e protexer a contorna mariña é un traballo de toda a sociedade». A directora de mercadotecnia de Ecoembes, Neves Rei, pensa que os pescadores "son os auténticos heroes do mar. Cada día recollen residuos nas súas redes, transpórtanos nos seus barcos e deposítanos nos colectores dos portos para que podamos reciclalos". Irene Díez, directora de Ecoalf, comenta que nun lustro recuperaron "500 toneladas de lixo e demostramos as posibilidades da reciclaxe".
A fundación recorda a necesidade de xestionar correctamente os residuos do Covid-19: "Co que sabemos sobre os impactos do lixo mariño, non podemos permitir que as luvas e máscaras cheguen ao mar; a xestión da crise e a recuperación han de basearse na responsabilidade".
O proxecto sumou 151.975 quilos de residuos mariños en España en 2019, coa participación altruísta de 2.600 pescadores que faenan en 550 barcos pesqueiros de arrastre de 40 portos. Ese ano prevén analizar o lixo recolleito e comunicar o resultado do estudo a cada un dos portos que participen nesta acción. Os datos estarán dispoñibles na plataforma Marnoba.
PESCADO POR LIMPAR. Doutra banda, Peixería Grallal, de Covas, que celebra o seu 30 aniversario, obsequiou con peixe a cantas persoas recolleron residuos este luns das praias de Viveiro: Covas, Area e Abrela, a quen llos cambiaron por peixe, segundo o peso do lixo retirado. Galipizza tamén colaborou regalando un "fardiño" de pescada para consumir no seu local de Covas.
