A MARIÑA. O bo tempo dos últimos días atraeu ata a costa lucense a pescadores furtivos, quen segundo os profesionais aproveitan a conxuntura e que o sector ten pechada a extracción para levar o percebe que agora está en fase de recuperación. Así o denuncia o patrón maior de San Cibrao, Javier Sánchez Cadrado, quen asegura que «cando no vemos pola costa avisamos e poder botámolos».
Os profesionais adoitan extraer este recurso entre os meses de xuño e agosto, así como en Nadal, que é cando maior valor ten no mercado, que ascende de forma parella á demanda. Os furtivos compiten nas mesmas datas, pero tamén fose delas. Se as condicións do mar son óptimas buscan os mellores horarios para tratar de eludir os controis, aínda que os guardapescas realizan quendas de mañá e tarde para evitar a súa acción, pero os profesionais por lei non faenan a partir das seis da tarde.
REINCIDENTES. Os servizos de vixilancia xa os teñen fichados, porque normalmente son os mesmos. Na súa maioría proceden do Ortegal coruñés, Cedeira, Valdoviño e Ferrol, aínda que ocasionalmente detectaron algún que acudiu desde a veciña Asturias.
Moitos acoden co pedido feito ou despois ofrecen o produto pola rúa e tamén a restaurantes. Ademais, xa os viron no exterior da lonxa de Cedeira, onde lles adquiren o produto aos compradores de marisco.
A normativa rexistrou cambios e en teoría o furtivismo pasou a ser delito, pero estas infraccións son tratadas como faltas administrativas cun período de prescrición de tres anos.
Os axentes que lles capturan, que adoitan ser do Seprona, a Garda Civil, os Gardacostas ou os vixiantes das confrarías, comisan todo o produto que poden e despois aplícaselles unha sanción por parte das autoridades, pero adoitan declararse insolventes e teñen o patrimonio a nomes doutras persoas, normalmente familiares. Isto fai que os furtivos habituais, que son reincidentes, acumulen multas, algúns por máis de 100.000 euros tras ser sorprendidos en múltiples ocasións.
O último recurso contra o sistema que empregan para eludir a lei consiste en que o avogado de sancións presente unha reclamación por vía xudicial debido á falta de pagamento das sancións dentro do prazo establecido. Na actualidade algún xa está pendente de xuízo.
