O persoal de Vestas en Viveiro programou sete manifestacións máis en varios puntos da provincia e dous cortes de estrada ata fin de ano. O calendario de mobilizacións, ante a decisión da empresa de pechar as instalacións de Chavín o 31 de decembro executando un Ere para os seus 115 traballadores, é provisional e está suxeito a posibles modificacións.
Os traballadores, que na tarde deste venres maniféstanse en Foz —con saída da zona portuaria ás cinco—, prevén pechar este calendario en Lugo o 22 de decembro.
Entre unha protesta e outra, están previstas manifestacións todos os venres: en Viveiro (19 de novembro), Ribadeo (día 26), Burela (3 de decembro), San Cibrao (10 de decembro) e Xove (día 17).
A maiores, está convocada a folga xeral na Mariña para o vindeiro mércores 17 e haberá dous cortes de estrada. Serán o día 24 de novembro na ponte do Barqueiro e o 15 de decembro na de Landrove.