O plantel de Vestas iniciará este mércores as concentracións diante da planta de Chavín, en Viveiro, segundo acordaron os representantes dos traballadores na reunión extraordinaria do comité desenvolvida ese martes, tras a que se ratificaron estas medidas nunha asemblea de traballadores. As protestas desenvolveranse á hora do bocadillo, de luns a venres ás dez e media da mañá no aparcadoiro.
As protestas acordadas na mañá deste martes teñen como obxectivo expresar o rexeitamento ao anuncio do Ere extintivo para a totalidade dos 115 empregados comunicado este luns polos directivos da multinacional danesa á dirección de planta, o comité e despois aos propios traballadores.
O comité de empresa da factoría de ensamblaxe e fabricación de aeroxeradores vivariense tamén manterá esta tarde, ás oito e media, unha reunión no concello coa alcaldesa de Viveiro, María Loureiro, a quen ten previsto solicitar un encontro con todos os grupos políticos, a desenvolver nunha xornada posterior.
Os traballadores de Vestas estudan así mesmo máis concentracións e accións de protestas, entre as que prevén unha na Praza do Concello, con data aínda pendente de confirmación.
