Os traballadores da auxiliar de Alcoa Maessa informan do seu rexeitamento unánime á oferta que lles fixo a dirección na negociación do novo pacto de empresa e avanzan que organizarán paros se non logran un acordo. Entre as súas demandas están melloras salariais.
"A oferta da empresa está moi lonxe da meta á que se quere chegar este ano", din os representantes dos traballadores, que aseguran que hai operarios doutras empresas que cobran por desempeñar o mesmo traballo "máis de 4.000 euros anuais que os de Maessa", ou que "un oficial doutras auxiliares cobra máis que un soldador homologado oficial de primeira en Maessa".
O persoal desta auxiliar, formada por 44 traballadores e que realiza o mantemento mecánico no departamento de precipitación de Alcoa, denuncia doutra banda "que se seguen facendo xornadas de máis de doce horas, logo de notificarllo á dirección da empresa, e que se planifican quendas a doce horas", segundo trasladan os representantes sindicais, de UXT.
