A Garda Civil mantén aberta a investigación sobre o accidente da furgoneta que apareceu despeñada o sábado pola tarde no fondo dun barranco duns 200 metros á altura do miradoiro de Moreiras, na parroquia vicedense de San Román do Val. Os axentes teñen previsto tomarlle declaración ao home, que segundo apuntaron algunhas fontes é de Cataluña e xa se atoparía de volta na cidade condal.
Un dos extremos que deberá aclarar o home é como puido abandonar o lugar do suceso, como supostamente sucedeu, debido a que é de dificil acceso e para chegar ao vehículo foi necesaria a presenza da Pesca 2. Foi o rescatador do helicóptero de Salvamento o que accedeu ao fondo do precipicio nadando.
A investigación, que levan a cabo axentes do Grupo de Investigación e Análise de Tráfico (Giat) de Lugo, tratará de esclarecer os motivos do accidente, así como o momento e as circunstancias nas que se produciu.
O vehículo no que se desprazaba fora alugado e pertencería a unha empresa de Barcelona. O condutor estaría a pasar as vacacións de Semana Santa na zona e segundo as informacións que transcenderon estaba hospedado nunha pensión do Vicedo. O gardarraíl roto detectárono uns sendeiristas que preparaban unha ruta pola zona o sábado pola tarde, aínda que se apuntou a que levaba roto desde o xoves.
Tras o achado, mobilizáronse numerosos efectivos que estiveron a rastrexar a zona tras descartarse que houbera alguén no interior do vehículo.