O Obispado de Mondoñedo-Ferrol confía en que o xuízo que se vai celebrar entre o 20 e o 21 de marzo na Audiencia Provincial de Lugo pola subtracción de obxectos relixiosos e de culto, imaxes de santos, mobles e diversos aveños de varias parroquias desta diócese sirva para arroxar “luz” sobre a autoría deses roubos e “clarificar os feitos”.
Nun comunicado, o Obispado de Lugo quixo expresar que confía “na acción da Xustiza” e apóiaa "plenamente” ante a inminencia do xuízo no que o fiscal solicita catro anos e medio de cárcere, unha multa de 3.000 euros e a correspondente indemnización á Diócese de Mondoñedo-Ferrol para o expárroco José Emilio Silvaje.
Acúsao dun delito continuado de apropiación indebida entre os anos 2008 e 2012 cando exerceu o seu ministerio en diversas parroquias dos municipios de Trabada e Ribadeo.
O Obispado indica nese comunicado que sempre ofreceu “a súa plena colaboración” para chegar ao fondo deste asunto, “como así o demostra a presenza como testemuñas do vigairo xeral e o delegado de Patrimonio” da Diócese, aínda que non se presente como acusación particular.
De feito, confía en que “a vista oral e a posterior sentenza arroxen luz e clarifiquen os feitos”, ademais de precisar que a Diócese “redobrará os seus esforzos para velar polos intereses do pobo de Deus a través dunha xestión transparente dos seus bens culturais”.
Ademais, “garante que a causa xudicial aberta non interferirá nin condicionará calquera outro proceso interno de investigación que se leve a cabo na Diócese”.
