Un meme antigo compartido polo alcalde de Ribadeo sobre a Familia Real e Francisco Franco xerou división de opinións nas redes sociais.
Fernando Suárez Barcia colgou no seu perfil de Facebook unha imaxe de Felipe VI, dona Letizia e a princesa Leonor e a infanta Sofía sentados á mesa acompañados, grazas a unha montaxe, polo ditador, cuxo corpo estaba preservado da descomposición dentro dunha neveira dunha coñecida marca de refrescos.
A imaxe, para algúns de mal gusto, valeulle algunhas críticas, parte delas chegadas desde filas populares, e tamén comentarios a favor de quen vían a súa publicación amparada pola liberdade de expresión.
O caso é que o rexedor acompañaba a foto dun texto –"Asunto zanxado. Volta á casa polo Nadal"– en relación coa polémica do traslado dos restos de Franco, e no que daba a entender que o problema se resolvería levando o ditador ao Palacio da Zarzuela.