As concentracións convocadas pola Asociación Galega de Medicina Familiar e Comunitario (Agamfec) en distintas localidades galegas multiplicáronse este martes na Mariña xa que ademais de en Viveiro, onde levan facéndose dúas semanas, hóuboas tamén noutros centros de saúde da comarca como Ribadeo, Burela, Foz ou San Cibrao secundadas por persoal sanitario para esixir melloras na atención primaria.
A protesta coincidiu na cidade do Landro coa denuncia do colectivo Viveiro, pola Dignidade da Atención Primaria de que xusto este martes faltaron tres facultativos na quenda de mañá, unha situación que tamén denunciou o PSOE local. "Ducias de veciños non foron atendidos este martes non centro de saúde porque a Xunta non cubriu as baixas por enfermidade de tres médicos", dixo a alcaldesa, María Loureiro. "Esta situación é insostible, é un auténtico caos xa que os catro profesionais que estaban de mañá no ambulatorio tiveron que facer o traballo de sete facultativos e moitos usuarios quedaron sen ser atendidos", afirmou a rexedora, que acudiu ás protestas xunto a edís do seu goberno.
Loureiro recordou que non é a primeira vez que se dá unha situación así, "pois durante o Nadal houbo semanas con tres médicos na quenda de mañá, como sucedeu este martes. Isto provoca que os veciños teñan que agardar ata dez días por unha consulta ou que os médicos atendan a 60 persoas nunha mañá".
PLENO MUNICIPAL. O PSOE, os non adscritos e Son Viveiro apoian unha moción que se debate este mércores no pleno de Viveiro para instar á Xunta a cubrir as baixas de medicina xeral e pediatría no centro de saúde local, reforzar o persoal, dotar aos médicos do material necesario e realizar un informe sobre os problemas do edificio para liquidalos.
O BNG, fóra da corporación, entende que a moción que se debaterá no pleno deste mércores pola tarde parte da que rexistrou a súa agrupación o 23 de xaneiro e pide que se enmende para incluír entre as reclamacións á Xunta a atención fisioterapéutica polas tardes, xa que só hai unha profesional de mañá e despois a instalación está pechada, "provocando longas listas de espera, de ata un ano, ou a derivación a centros privados".
