Unha nova rotura na tubaxe de fibrocemento de abastecemento de auga na zona de Remior do municipio de Barreiros volveu provocar un desgusto aos traballadores municipais, que tiveron que aplicarse a fondo para selar unha fuga rexistrada a só uns poucos metros da que se rexistrou anteriormente, a comezo do pasado verán e que lles causou máis problemas.
Neste caso o servizo de auga tivo que cortarse de novo nunha zona de pártea norte do municipio de Barreiros mentres se fixeron algúns dos traballos máis urxentes. O alcalde en funcións ao longo destes últimos días, Antonio Veiga, explicou que o servizo quedou totalmente restablecido xa durante a mañá e que conseguiron controlar sen problema a situación, aínda que os traballos prolongáronse durante parte da tarde.
A zona na que se produce esta rotura é xunto á estrada das praias na zona de Remior. Trátase dunha tubaxe de fibrocemento que é moi fráxil e que ademais se atopa nun lugar que está moi exposto a calquera tipo de incidencia.
Veiga comentaba que era probable que as continuas choivas do mes de novembro puidesen influír nesta rotura "porque a terra está totalmente enchoupada e pesa máis. Se polo que sexa un coche pasa preto e fai un pequeno golpe, é sinxelo que rompa debido ao seu estado de deterioración".
CAMBIO ATRASADO. A localidade focense foi obxecto doutro episodio de similares características, neste caso na zona de Marzán afectando a un bo número de veciños. Os operarios municipais estaban a traballar con urxencia a última hora da tarde deste sábado para devolver o servizo á normalidade.
O alcalde de Foz, Fran Cajoto, apuntaba que non se trataba dunha rotura de importancia e indicaba que foi nunha tubaxe de fibrocemento "das que queremos ir cambiando pouco a pouco como xa fixemos con algunhas".