Norvento acordou con Vestas a subministración de 27 aeroxeradores que suporán un total de 93,6 megawatts (MW) e que irán destinados a varios dos parques eólicos que a compañía lucense construirá na comarca da Mariña durante 2019. Actualmente atópanse en fase de fabricación.
Segundo informou a empresa de tecnoloxías renovables nun comunicado, Norvento conta con 128,6 MW en construción en Galicia (93,6 destinados a este proxecto con Vestas), para os que obtivo retribución na poxa de maio de 2017. Tras asegurar os fondos para o financiamento dos proxectos, activáronse os contratos de subministracións dos aeroxeradores, derivados dos acordos entre ambas as empresas de comezos de 2018. En concreto, Vestas fornecerá 27 aeroxeradores con potencias unitarias de 3,3 e 3,6 MW.
Estes aeroxeradores equiparanse con convertidor de plena potencia e presentarán un diámetro de rotor entre 126 e 136 metros, para adaptarse ás condicións de vento particulares de cada localización. Con este contrato, Norvento achégase ao cumprimento dos prazos, que segundo as bases legais da poxa de maio de 2017 deberán estar en operación antes de finalizar 2019.
O director de Enerxía de Norvento, Iván Nogueiras, indicou que están "comprometidos a levar a Galicia a mellor tecnoloxía eólica e os aeroxeradores de Vestas eran os máis adecuados, sendo eficientes e silenciosos". Pola súa banda, o responsable de Vendas de Vestas Mediterranean, Javier Rodríguez Díez, explicou que "os aeroxeradores que se fornecerán a Norvento contan cun deseño baseado nos avances tecnolóxicos para aproveitar ao máximo o potencial eólico".
