Logo de tres días consecutivos con limitacións de velocidade como consecuencia da néboa -os vehículos tiñan que circular a menos de 60 quilómetros por hora-, as malas condicións de visibilidade que condicionan a seguridade dos propios usuarios obrigaron a cortar a circulación na autovía do Cantábrico (A-8) ao seu paso por Mondoñedo.
Segundo a información facilitada pola Dirección Xeral de Tráfico (DXT), a autovía quedou cortada este mércores pola noite –ás 21:50 horas– en ambos os sentidos da circulación, concretamente no tramo comprendido entre os quilómetros 536 e 552, o que coincide co Alto do Fiouco.
Como é habitual, os condutores que circulan pola autovía son avisados mediante a correspondente sinalización e os paneis luminosos desa circunstancia.
A circulación foi desviada pola estrada Nacional 634, cuxo arranxo volveu a reclamar esta semana o municipio de Mondoñedo, a causa do mal estado no que se atopa o firme e a deficiente sinalización.
Os problemas coa néboa nese punto da Autovía do Cantábrico son recorrentes e, de feito, está en marcha un proxecto de Ministerio de Transportes, Mobilidade e Axenda Urbana para a instalación de prototipos sobre o terreo que permitan avanzar en solucións alternativas para superar esta situación.