A noite ribadense recuperará un local que resultou emblemático a finais dos anos noventa e nos primeiros 2000, cando a movida na localidade atraía a miles de persoas nunhas noites históricas. O día 7 de decembro reabrirá a discoteca Futura, na rúa Vilalba, un local moi importante polas súas características, cunha pista de máis de 500 metros cadrados. Para esta sesión é necesario sacar entrada, que se pode xa conseguir na web discotecafutura.com. Para reabrir nesta primeira xornada haberá un invitado de luxo que será o DJ Omy Cid. O seu DJ residente será DJ Pérez.
A discoteca reábrea un empresario vivariense logo de obter a licenza municipal para facelo, algo que reverte unha situación estraña que se deu o pasado mes de xuño, cando a reapertura do local durou un só día. Na xornada seguinte o alcalde, Fernando Suárez, admitiu non saber nada da reapertura de Futura e as inspeccións que se lle fixeron revelaron que non podía funcionar nesas condicións.
Naquel momento o empresario desculpouse nas redes sociais e asegurou actuar "de boa fe" e lamentou que a súa actuación "puidese causar algún dano a alguén". Agora o rexedor ribadense explica que a discoteca Futura xa pode abrir "logo de ter cumprido todos os trámites e esixencias legais que o Concello lle indicou aos seus promotores, desde esta semana poden desenvolver a súa actividade cando o desexen".
Suárez Barcia dixo querer ser claro nese punto porque "ao principio", en referencia á súa primeira apertura, "vimos que as cousas non se plantexaban ben e houbo que indicárllelo. Desde este Concello procuramos ser áxiles nos procedementos administrativos e así o demostramos cando as cousas preséntanse correctamente. Cando non sen fan, veñen os problemas, os atrasos, etcétera. E nada máis lonxe da nosa intención".
O primeiro intento de abrir, en xuño, xerou tensión
Quere pór este caso como exemplo das súas palabras aludindo que "cando todo está ben presentado, as obras necesarias feitas e as autorizacións outorgadas, todo é moito máis áxil" e engadiu que a reapertura da discoteca é "unha boa nova para toda a nosa mocidade, que terá agora unha oferta máis variada de locais de lecer".
Rebaixa deste xeito de forma notable a tensión xerada en xuño, cando indicou quedarse "sorprendido" ao abrir o local "sen que tivesemos ningún tipo de coñecemento de que isto ía suceder".
