Un muro con arte internacional

Os nove deseños que este ano se pintarán no muro do porto de Burela no marco do Certame Internacional de Pintural Mural, Amarte, xa están elixidos. O xoves pechábase o prazo para presentar propostas e alcanzáronse os 58 traballos, a cifra máis alta de todas as edicións convocadas. "Esta nova edición de Amarte, creo que é máis internacional que nunca", destacou o concelleiro de cultura, José Díaz, "xa pintaran artistas estranxeiros, pero este ano temos un 33% de participantes de fóra de España". E é que chegaron deseños de distintos países e entre os finalistas hai un artista portugués, outro ucraíno e unha moza chilena residente en Italia.

Para a selección dos finalistas, o Concello contou coa colaboración de Marcos Pereiro, gañador do certame o primeiro ano; Delio Rodríguez Sés, que levou o terceiro premio na primeira edición; Guillermo Paz e Diego Anido, gañadores o ano pasado e David Catá, gañador en 2018 e que este ano, ademais, volverá presidir o xurado que elixirá ao mural gañador. "Creo que é un comité de avaliación máis que reputado para isto e que nos axudou moito analizando as obras porque había moitas de moitísimo nivel, seguro que moitas quedan fóra, pero é imposible que se poidan pintar máis", asegurou Díaz, "este ano son nove e hai que seleccionar esas nove".

FINALISTAS. Os nove finalistas son: Filipe Alexandre, de Portugal, coa obra Tartaruga; Anna Repullo de Barcelona con Mariñeiros; Armen Grygorov, ucraíno residente en Barcelona, con Sirena vermella; Alessia Inoccenti, nacida en Chile, pero residente en Italia con Marsinfin; Martín Cal da Coruña con A nosa Burela; Daniel Caro e Guillermo Torres de Madrid, con Soños eternos; Daniel Pedrosa de Barcelona con Sentimento dinámico; Tirso Paz, natural de Lugo pero residente en Barcelona con Meiga do mar, e Pablo Lage de Lugo, coa obra Todo o que vai, volve.

Os artistas elixidos estarán a pintar no porto desde o mediodía do xoves 5 ao domingo 

"Hai estilos moi diferentes este ano que non podemos adiantar porque sempre é unha sorpresa velos pintar, pero abarcan desde temas máis coloristas que xogan coa cor e as proporcións, incluso co 3D, ata deseños realistas pasando por imaxes de aspecto cómic", afirmou o concelleiro, que avanzou que a elección do gañador será moi complicada: "Calquera deles podería gañar".

O certame comezará o 5 de agosto, ás doce da mañá, e terminará o domingo, á mesma hora. A entrega de premios está prevista para a unha menos cuarto a cargo de Sergio Pazos na Praza do Concello e a continuación haberá unha actuación de Eladio y los Seres Queridos.

PANDEMIA. José Díaz espera que a situación sanitaria non impida a celebración do certame: "Confío en que se celebre porque o ano pasado, cunha situación quizais peor, puidemos facelo con seguridade e sen problema".

Co que mostrou máis dúbidas Díaz foi coa programación musical que está prevista para recordar a Feira do Bonito, que este ano non se celebra no seu formato habitual. Están previstos os concertos de Luar na Lubre, o venres e de Tribo Folk o sábado. Ambos na Praza do Concello. "É mellor esperar para poder confirmar todo", asegurou Díaz neste sentido.