Unha muller resultou ferida e tivo que ser trasladada ao Hospital Público da Mariña por unha ambulancia do 061 a consecuencia dun accidente ocorrido pouco antes da unha da tarde deste domingo no municipio de Foz, concretamente nun camiño secundario xunto á Avenida de Sarria.
Dito accidente foi entre dous vehículos de circulaban polo lugar e que chocaron nun punto moi próximo ao cámping que se atopa nesa zona.
A consecuencia diso, ambos os automóbiles sufriron danos de diversa consideración e foi necesario mobilizar a unha ambulancia do 061 para atender a esta muller, que era a que presentaba aparentemente maiores lesións de todas as persoas implicadas no accidente.
MEDIOS. O servizo do 112 Galicia tivo que mobilizar numerosos medios para a atención desta colisión e desprazáronse ao lugar non só os servizos asistenciais do 061, senón tamén a Policía Local e Protección Civil de Foz, o GES de Cervo e os bombeiros de Barreiros.
Estes últimos acudiron para proceder a realizar un limpado dos restos que quedaran na calzada de ambos os vehículos e algunhas verteduras que facían perigosa a circulación polo lugar. Esta interrompeuse un tempo ata que a contorna quedou completamente limpo de novo.
