O ribadense Álvaro Martínez Fernández proclamouse vencedor absoluto da quinta edición do Desafío Asti Challenge, celebrado hai uns días en Burgos. Trátase dun concurso no que participan mozos afeccionados á robótica chegados de toda España co obxectivo de construír un enxeño dese tipo baixo unha serie de condicionantes que lles marca previamente a organización. Álvaro Martínez xa gañara anteriormente este desafío tecnolóxico en tres ocasións consecutivas. A correspondente a 2020 suspendeuse pola pandemia.
Martínez é o único integrante dun equipo que denominou Eo Tec e ao seu robot bautizouno como Pairo e ten unhas dimensións mínimas, de nove por sete centímetros e cinco de altura.
A pesar diso conta cun microcontrolador ESP con bluetooth e Wifi, sensores TOF de distancia, sensores infravermellos para a lectura de liña, batería de litio, micromotores de 500 r.p.m. e servomotores como actuadores.
O seu obxectivo para esta edición do Asti Challenge era conseguir o robot de tamaño máis pequeno co mínimo custo posible.
O xurado do torneo non tivo ningunha dúbida e quedou moi impresionado xa que as dimensións do robot eran mínimas e o seu custo foi dun 20% do orzamento que tiñan asignado. Pairo conseguiu os mellores resultados en todas as probas do challenge.
